Praia das Catedrais. Xeoturismo
A praia de As Catedrais ou Augas Santas áchase no extremo noroeste do concello de Ribadeo. Un lugar que se fixo famoso a nivel internacional por albergar un espectacular conxunto de arcos mariños que asemellan aos arbotantes dunha catedral gótica. Todo iso resultado dun intenso e continuo proceso de erosión mariña ao longo de miles de anos.
Os materiais que conforman este lugar son antigos sedimentos mariños que se depositaron nas proximidades do supercontinente Gondwana hai uns 500 millóns de anos, cando se atopaba preto do Polo Sur. Eses sedimentos serían un conxunto de capas intercaladas de arxilas e areas, que chegou a ter máis de 4000 metros de espesor.
150 millóns de anos despois prodúcese un acontecemento xeolóxico sen precedentes, o gran choque de continentes que vai dar lugar á famosa Panxea. Como consecuencia diso o que eran rochas sedimentarias transfórmanse en rochas metamórficas, é dicir, os sedimentos arxilosos convértense en lousas e os areosos en cuarcitas.
Sorprendentes formacións xeolóxicas:
o paso a paso no proceso de creación
Este areal é internacionalmente coñecido polos seus incribles arcos, pero a importancia xeolóxica reside en que é un exemplo vivo da evolución natural do seu proceso de creación, e á súa vez permite coñecer cada unha das etapas implicadas nel. Todo se inicia a partir dunha debilidade nas rochas do cantil, como son as fracturas, nelas a erosión mariña vai ser máis intensa. A medida que o desgaste é maior orixínase unha cova mariña ou furna -nome que se dá en Galicia-. Posteriormente fórmase o túnel rochoso, que é unha cavidade con saída. Cando dúas fracturas se cruzan normalmente prodúcese o colapso do teito da cova mariña ou furna -pola súa maior debilidade nese punto- creando así unha especie de pozo ou cheminea dende a que se ve o exterior. É o que localmente se denomina “Ollo” e que vén dado polos mariñeiros do litoral de Ribadeo. A medida que o túnel se vai facendo máis curto e vai aumentando en altura, comeza a desenvolverse un arco rochoso. Unha evolución que remata sempre da mesma maneira: o arco colapsa e fórmase un illote.
Púidose comprobar que, nalgunhas zonas da praia, como na súa parte máis oriental, existe unha intensa fracturación que facilita aínda máis a formación de arcos e estruturas asociadas. O proceso completo podería durar varios miles de anos, aínda que podería verse acelerado por cambios na intensidade da acción mariña, como sucedeu no ciclo 2013-2014.
Máis información: Praia das Catedrais
Xeorutas en Ribadeo (Organizadas polo Concello en tempada media e/ou alta). Máis info en: Oficina de Turismo de Ribadeo.
Outras propostas para a práctica do Xeoturismo na Mariña. Máis info aquí.
