Observación ornitolóxica en Ribadeo

Ribadeo: A Ría como santuario para aves acuáticas e limícolas

Ao longo do Camiño Natural do Cantábrico, seguindo a ruta sinalizada, pódense facer diferentes paradas para a observación de aves, dende o porto ata a praia de Os Bloques. Durante este percorrido, é posible avistar especies como o pato asubiador común (Mareca penelope), o pato albelo (Anas acuta), a garzota común (Egretta garzetta), o mazarico real (Numenius arquata), a avefría choromica (Vanellus vanellus) e a águila peixeira (Pandion haliaetus). Tamén se rexistran especies menos comúns, como o mergullón de pescozo negro (Podiceps nigricollis) e o bilurico escuro (Tringa erythropus).

Para unha observación máis detallada, é recomendable visitar os observatorios ornitolóxicos de Muro de Lamas e Reme, accesibles a través da N-642 de Ribadeo a Vegadeo (Asturias).

Fóra da ría, outro punto de gran interese é a zona de Rinlo, accesible en coche ou a través dun sendeiro dende a vila. Aquí atópanse a charca, os campos abertos e as antigas cetarias, situadas nas proximidades da ZEPA Corredor Migratorio Galaico-Cantábrico Occidental. A pesar do seu tamaño reducido, nesta contorna poden observarse numerosas especies, incluíndo algunha rareza.

Na charca de Rinlo, especies habituais como o bilurico das rochas (Actitis hypoleucos), a garza real (Ardea cinerea), o lavanco real (Anas platyrhynchos), o cullereiro (Spatula clypeata) ou a tartaraña das xunqueiras (Circus aeruginosus) son frecuentes. Durante as migracións, tamén descansan aquí píllara dourada europea (Pluvialis apricaria), píllara cincenta (Pluvialis squatarola) ou bilurico común (Tringa totanus).

Os prados e cultivos da contorna son ideais para observar a laverca común (Alauda arvensis), o pica dos prados (Anthus pratensis), e nos matos pódense identificar a pauxa de cabeza negra (Curruca melanocephala) e o rabirubio tizón (Phoenicurus ochruros). No inverno, tamén se poden ver bandadas de pinpín común (Fringilla coelebs), xílgaro común(Carduelis carduelis) ou verderolo comùn (Chloris chloris), que son presas habituais do falcón esmerillón  (Falco columbarius). Durante os pasos migratorios, poden aparecer especies máis escasas como o bufo das xunqueiras (Asio flammeus), o cuco común (Cuculus canorus) ou o escribidor nival (Plectrophenax nivalis).

Entre as antigas cetarias de Rinlo, atopamos un bo punto de observación mariña dende onde mirar cara ao mar e aos illotes próximos, como o de Pena dos Corvos, onde adoitan descansar o virapedras común (Arenaria interpres), a gaivota patiamarela (Larus michahellis), o gaivotón atlántico (Larus marinus) e o corvo mariño cristado (Gulosus aristotelis). En días de temporal, tamén pode verse pasar preto da costa o mascato atlántico (Morus bassanus).