Ollos de Rinlo. Xeoturismo
Os “Ollos” de Rinlo atópanse no extremo norte do concello de Ribadeo. A denominación de “Ollo” é un termo local, onde os mariñeiros vían ollos de luz no cantil.
Os cantís desta zona do litoral ribadense están formados de rochas metamórficas de procedencia sedimentaria -lousas e cuarcitas-, é dicir, eran sedimentos mariños fai 500 millóns de anos que despois se viron afectados por un incremento na presión e temperatura, como consecuencia do colosal choque entre Laurusia e Gondwana, os dous supercontinentes que concentraban todos os terreos emerxidos do planeta fai 350 millóns de anos. Así mesmo, este que deu lugar a Panxea, deformou dunha maneira intensa tanto a lousas como a cuarcitas. Resultado de todo iso agora os materiais dispóñense en capas superpostas e cunha inclinación cara ao mar.
Unhas rochas pouco frecuentes relacionadas coa apertura do Océano Atlántico
Nos cantís da contorna do porto de Rinlo é posible observar a presenza de pequenos corpos lineais e estreitos dunhas rochas pouco frecuentes, as diabasas, son de tonalidade verdosa ou marronácea -cando está oxidada- que cortan verticalmente ás lousas e cuarcitas. Estas rochas son magmáticas, e o seu arrefriado produciuse a escasa profundidade da superficie terrestre, concretamente entre os 5 e os 8 quilómetros. A súa cor verdosa débese a que son ricas en magnesio, aínda que tamén teñen ferro, é por iso que son rochas bastante densas. A súa orixe parece estar en relación coa apertura do Océano Atlántico, é dicir, hai uns 200 millóns de anos, debido a que a codia terrestre sufriu un salientable estiramento, o que facilitou a chegada de magma a zonas non moi afastadas da superficie.
Como as lousas e cuarcitas teñen unha resistencia diferente fronte á erosión, é frecuente observar distintos exemplos de erosión diferencial -por acción do mar e do salseiro mariño-, nos que as lousas se desgastan moito máis que as cuarcitas.
Os “Ollos”: curiosas formas litorais
As curiosas formas litorais denominadas “Ollos” e similares a pozos que se abren no interior do cantil, forman parte do proceso de erosión que en ocasións culmina coa creación de arcos. Na contorna de Rinlo varios destes “Ollos” foron utilizados para a instalación de cetarias ou viveiros de marisco durante case 90 anos. O seu aspecto circular débese ao colapso dun túnel mariño en zonas de debilidade, como pode ser a intersección de varias fracturas.
Xeorutas en Ribadeo (Organizadas polo Concello en tempada media e/ou alta). Máis info en: Oficina de Turismo de Ribadeo.
Outras propostas para a práctica do Xeoturismo na Mariña. Máis info aquí.
Más información: Rinlo
