Visitas guiadas na Mariña - Verán 2023

Na Mariña Lucense, e con maior intensidade nos meses de verán, poderás atopar diversos programas de visitas guiadas ofrecidas polos concellos que configuran o destino. Son propostas que nos convidan a coñecer os centros históricos, contornas naturais e outros espazos de interese do territorio.

Coñece o noso patrimonio e namórate da Mariña!

Barreiros - "Barreiros queda en ti" (Xullo - Agosto)

Turismo de Barreiros organiza nestes meses, cinco percorridos diferentes para explorar de forma gratuíta distintos atractivos da zona. Propostas naturais e culturais como: A vida aos pés do Mar Pequeno; Rutas xeolóxicas Litoral de Barreiros; San Miguel de Reinante, pasado moi presente ou Santo Estevo do Ermo. Refuxio de biodiversidade e patrimonio, e outras tan orixinais como O día a día dun gandeiro. Granxa Mantoño Holstein para coñecer o traballo dos nosos gandeiros.

Máis información: Barreiros Turismo

Burela - "Burela en ruta" (Xullo - Agosto - Setembro)

Este programa convídate a sumerxirte no patrimonio cultural e natural de Burela, nos oficios tradicionais do mar e no funcionamento dun dos portos máis importantes do Cantábrico. O abanico de propostas inclúe: visitas ao Barco Museo Bonitero Reina del Carmen; a Ruta do Peixe, con visita á lonxa; visitas a Conservas Faro de Burela; visitas tamén á "Moncloa" (Asociación de Mariñeiros Xubilados e Afíns) e a tres xa moi coñecidas Rutas Xeolóxicas (A Marosa, O Perdouro e O Cantiño)

Máis información: Concello de Burela

Lourenzá - "Vistas ao Mosteiro de San Salvador"

Lourenzá Turismo organiza visitas guiadas ao impresionante Mosteiro de San Salvador de Lourenzá nun percorrido que inclúe o acceso á igrexa, sancristia, relicario, capela da Valvanera e o sárcofago paleocristián do Conde Santo. Os luns ás 12 e 17 horas e de martes a sábados ás 12 horas. Reserva previa e información: 646 384 124 e lourenzaturismo@outlook.es.

Más información: Lourenzá Turismo

Mondoñedo (Xulio - Agosto - Setembro)

Se queres descubrir por que Mondoñedo é un lugar moi especial, pódeste apuntar ás visitas guiadas gratuítas polo centro histórico que organiza Turismo de Mondoñedo cada mércores de verán ás 12:00 hs. (excepto mércores 10/08). Non é necesaria reserva.

Máis información: Mondoñedo Turismo - 982 50 71 77

O Vicedo - "Mércores de natureza" (Xullo - Agosto)

O concello do Vicedo convídate a estar activo realizando actividades nas contornas naturais da Mariña, con propostas como subidas polo río Sor en kaiak, tramos do Camiño Natural Ruta do Cantábrico ou Xeorutas no concello.

Máis información: 982 59 01 95 - omix@concellodovicedo.org - Ayuntamiento de O Vicedo

Ribadeo - Programa de visitas guiadas (Xullo - Agosto)

Descubre todas as caras da historia de Ribadeo a través das súas visitas guiadas Ribadeo Antigo, Ribadeo Ilustrado (con versión tamén teatralizada) e Ribadeo Indiano. Tamén podes soprenderte cos segredos escondidos da costa cantábrica a través das castro rutas xeolóxicas que nos propón Turismo de Ribadeo ata setembro: as Xeorutas dos Arcos, da Ría, dos Pregues e dos Ollos. Son visitas gratuítas con reserva previa.

En setembro, o concello organiza "SetembroxNatural" un programa conformado por actividades de sensibilización e ocio que achega aos visitantes de forma activa aos valores naturais deste territorio. Propostas tan orixinais como "Baños de mar" ou "Froitos de mar" para enxalzar as calidades do mar como fonte de vida e saúde.

Máis información: Ribadeo Turismo

Trabada (Agosto)

Desde o mércores 9 de agosto e durante todo o mes, o concello de Trabada organiza un programa de rutas de Sendeirismo con saída desde a Oficina de turismo, todos os miércores e domingos ás 10:00 hs. Paseos de diversa intensidade en plena natureza, como a ruta do Monte Roxal-Teixido, a ruta do Vento, a Subida ó Picato ou as emblemáticas rutas polas fragas da Becerreira e de Vilapena.

Reserva de prazas: 982 143 956 - 982 135 011 (de 10:00 a 14:00 horas)

Máis información: Concello de Trabada

Viveiro (Xullo - Agosto - Setembro)

En Viveiro, tes opcións todos os días da semana. As visitas lévannos a explorar o seu pintoresco centro histórico, ascender ao Monte de San Roque, descubrir os antigos muíños de Balea, o río Landro, o Penedo do Galo e percorrer as sendas do Monumento Natural Souto da Retorta ou da área Etnográfica da Insua. Ademais, poderás ir no Vivertren nun percorrido panorámico por Covas e Celeiro.

Reserva de prazas: viveirovisitas@gmail.com

Máis información. Viveiro Turismo

Ourol (5 e 6 de agosto)
O amplo e variado patrimonio indiando co que conta o Concello de Ourol deu lugar á Ruta Indiana de Ourol. Para promovela, o concello organiza os días 5 e 6 de agosto, visitas guiadas e teatralizadas en bus de época para coñecer parte deste singular legado.

As reservas habilitaranse proximamente en: Concello de Ourol

Ademais destas visitas, na Mariña poderás atopar outras iniciativas públicas de caracter permanente e tamén propostas de tipo privado, que abren as portas para coñecer os principais recursos do destino.

Descubre A Mariña Lucense. Vive o norte de Galicia!