Monte Castelo - Viveiro. Xeoturismo

Denomínanse bolos en xeoloxía ás formas máis ou menos redondeadas que adquiren as rochas graníticas durante o proceso de erosión. A diferenza do que pode parecer, esa forma non a adquiren por estar expostas á intemperie se non que se produce mentres as rochas se atopan a varios metros baixo terra, onde hai unha interacción continua entre o granito e a auga do subsolo, o que provoca o seu maior desgaste. En ocasións dispóñense de forma caprichosa, son as que se denominan “Penas cabaleiras” ou en equilibrio, máis coñecidas como “Penas abaladoiras”. As formas que si se desenvolven á intemperie son as pías -depresións onde se acumula auga- ou as acanaladuras -desaugadoiros das pías-, que son frecuentes nas partes máis altas dos bolos.

Este monte está constituído unicamente por granitos.

Unhas rochas de orixe magmático e intrusivo, ou o que é o mesmo, xeráronse a partir do arrefriado de magma no interior da Terra, a profundidades comprendidas entre os 10 e os 15 quilómetros, e por ese motivo os seus tres minerais -seixo, feldespato e mica- son visibles dunha ollada. Neste caso o magma formouse pola intensa calor producida por un colosal choque de dous supercontinentes -Laurusia e Gondwana- fai 317 millóns de anos.

Os granitos de Monte Castelo son de gran groso, é dicir, os seus minerais aparecen en cristais de máis de 1 cm. Isto fainos interesantes dende o punto de vista ornamental, con todo, a ausencia de bos e amplos afloramentos non permitiu a súa explotación.

A presenza de lousas ao Oeste, e o val do río Landro ao Leste permitiu resaltar o carácter resistente dos granitos de Monte Castelo. É o que se coñece en xeoloxía como erosión diferencial, mentres que lousas e sedimentos son facilmente erosionables, os granitos resisten mellor o paso do tempo e resaltan aínda máis na paisaxe da ría de Viveiro.

A visión panorámica da contorna da ría de Viveiro permite entender a súa orixe tectónica, é dicir, unha estrutura xeolóxica -unha falla neste caso- facilitou a erosión do terreo de maneira máis intensa e o paso do tempo fixo o resto.