Cova do Rei Cintolo. Xeoturismo
A Cova do Rei Cintolo atópase no extremo sur do concello de Mondoñedo e considérase como unha das cavidades naturais máis grandes de Galicia, unha verdadeira rareza na xeoloxía galega.
A xénese deste tipo de cavidades prodúcese pola infiltración de auga de choiva nun terreo con rochas ricas en carbonato de calcio. Aclarar que a auga de choiva de por si non ten a capacidade de disolver as rochas calcarias, a clave está en que durante a viaxe das pingas de choiva dende as nubes ata a superficie da Terra vanse cargando no CO2 que hai na atmosfera, e en consecuencia a auga vólvese aceda e agora si pode disolver o carbonato de calcio. Esa auga vai circulando polo subsolo e busca zonas de fractura na rocha por onde lle é máis fácil moverse, ao mesmo tempo tamén as disolve. Nas cavidades que se van desenvolvendo, a auga vai aos poucos depositando o carbonato de calcio, e en consecuencia fórmanse os espelotemas. Este nome xenérico inclúe ás clásicas:
Estalactitas, estalagmitas e columnas.
Bandeirolas, macarróns, coraloides ou cornixas.
Os afloramentos de rochas calcarias no noroeste da Península Ibérica son moi escasos, limítanse á parte máis oriental, que é onde hai este tipo de formacións xeolóxicas propias para o desenvolvemento de cavidades como esta. Ás calcarias que aparecen na zona coñéceselles co nome de calcaria de Vegadeo, e teñen unha idade de aproximadamente 500 millóns de anos. Estes materiais orixináronse nun mar con pouca fondura -zona de plataforma continental- onde se produciu unha salientable actividade biolóxica, o que posibilitou a acumulación de grandes cantidades de carbonato de calcio, presente nos esqueletos e corpos de diferentes seres vivos. Aquel ecosistema pareceríase ao que son os actuais arrecifes, coa gran diferenza de que os corais aínda non existían no planeta, aparecerían 100 de millóns de anos despois.
Pero entre as capas de calcarias hai abondosos niveis de lousas, que representaría aos antigos sedimentos lamosos procedentes da erosión dos continentes próximos. Posteriormente eses sedimentos tamén estarían afectados por un lixeiro incremento na presión e a temperatura, que os converterían nas rochas metamórficas que son a día de hoxe. Sen ningunha dúbida a presenza das lousas vai condicionar a morfoloxía e evolución desta cova.
