Audioguía ficcionada de Mondoñedo
Mondoñedo e familia
Un paseo emocionante pola cidade de Cunqueiro
Coa figura do universal escritor Álvaro Cunqueiro Mora como fío condutor, este paseo ofréceche unha oportunidade para entrares no ambiente místico e cultural que caracteriza a Mondoñedo e percorrer os seus espazos máis emblemáticos.
Rula será a guía que te conducirá dende o Antigo Consistorio (Oficina de Turismo) ata o Cemiterio Vello de Mondoñedo, a través dun relato novelado, documental e testemuñal, no que coñecerás as voces de varios mindonienses que comparten os seus recordos sobre o xenial escritor. Alicia, que coñeceu dende nena a Álvaro; Remedios, filla do Pallarego; José María, xornalista e coñecedor de mil historias; Ángel, veciño namorado da obra de Cunqueiro, ou Fernando, que traballou toda a súa vida na imprenta de Sucesores de Mancebo, onde o autor escribía os seus artigos de prensa. Ademais de Cunqueiro, hai alusións a outros personaxes locais.
Duración: 47 minutos
Clica na imaxe inferior para ampliar o mapa co percorrido da audioguía
En todo momento, a través dos diferentes relatos, irás recibindo indicacións por onde debes ir. Por iso, unha vez conectado o son non se debe interromper e terás que apagalo só ao chegar ao final. Recomendámosche que encendas o audio e te deixes levar pola historia única e diferente destes lugares. Para evitar indicentes é moi importante que realices paradas en lugares seguros e que teñas coidado co tránsito rodado ao camiñar. Agardamos que disfrutes da experiencia!
En Mondoñedo, antes ou despois de facer a audioguía, podes visitar a Casa Museo de Álvaro Cunqueiro (CMAC), situada na Praza da Catedral.