Punta Corveira. Xeoturismo
A punta Corveira localízase no extremo nordés do concello de Barreiros. Emprazada nunha zona de cantís moi verticais e con numerosas formacións e estruturas xeolóxicas.
Rochas procedentes de sedimentos mariños de fai 500 millóns de anos
Este lugar de interese alberga por unha banda rochas de orixe sedimentario, uns materiais que hai algo máis de 500 millóns de anos eran sedimentos mariños con alternancias de natureza arxilosa e areosa, en ambos os casos procedentes da erosión dos continentes que tiñan próximos. Arredor dos 350 millóns de anos un océano péchase e os sedimentos emerxen en forma de rochas sedimentarias, pero este acontecemento levaría consigo tamén un salientable incremento na presión e temperatura, o que as transformaría en rochas metamórficas. Os sedimentos arxilosos darían lugar ás lousas e os areosos ás cuarcitas.
Zona de máxima curvatura dunha gran dobra deitada
Do mesmo xeito todo este conxunto de rochas metamórficas está intensamente dobrado, consecuencia da colisión entre Laurusia e Gondwana, tal e como se pon de manifesto pola presenza dunha gran dobra deitada de máis de 10 quilómetros -esténdese dende a ría de Foz ata a de Ribadeo-, sendo visible neste lugar a zona de máxima curvatura.
Un dique de aplita atravesa a dobra
Hai uns 280 millóns de anos prodúcese un evento magmático máis ou menos salientable, o que leva consigo a circulación de magma en zonas non moi superficiais da codia terrestre, é dicir, a uns 5 - 8 quilómetros de profundidade. Nestas condicións o magma non se arrefría moi rápido, pero fórmanse poucos cristais, son as que se coñecen como rochas subvolcánicas. Neste caso xeráronse varios corpos case horizontais deste tipo de rochas que cortan ás lousas e cuarcitas, pola súa composición química denomínanse aplitas.
Ademais, a presenza de filóns de seixo é habitual nesta zona do cantil, e son orixinados pola circulación subterránea de auga termal rica en sílice -óxido de silicio- a través das fracturas ou debilidades nas rochas, e que posteriormente ao arrefriarse o seixo cristaliza nelas.
Curiosas formas erosivas nas lousas
A nivel erosivo son curiosas as formas que adquiren as lousas nas zonas intermedias do cantil, onde a interacción do salseiro ou spray mariño cos minerais das rochas é moito maior. O resultado é a formación de pequenos ocos que se van facendo cada vez maiores e máis fondos, coñéceselles co nome de meteorización alveolar.
Outras propostas para a práctica do Xeoturismo na Mariña. Máis info aquí.
