Porto de Morás
Este foi un dos portos baleeiros da Mariña, desde a Idade Media ata o s.XVIII, desde os que partían as armadas para a caza das baleas que, durante as súas migracións, pasaban por diante das nosas costas. A súa actividade volveuse recuperar no século pasado, coa construción da factoría baleeira de Morás, e estendeuse desde 1965 ata o ano 1977.
Dirixida por Massó Irmáns S.A., ocupaba algo máis de 10.000 m2, cunha capacidade de almacenamento de 2.000 Ton de aceite en bidóns e unha cámara frigorífica destinada á carne. Chegaron a traballar unhas 60 persoas e o peche produciuse 8 anos antes da entrada en vigor da moratoria da caza de baleas en 1985.
Actualmente, tras a derriba das instalacións, no seu lugar existe unha senda peonil con paneis que versan sobre a historia baleeira, permanecendo, ademais, a antiga rampla de izado dos cetáceos.
Xusto á beira do pequeno porto, onde se practica a pesca artesanal de baixura, atópase a recollida praia do Portiño de Morás.
Nesta zona estaba tamén a fábrica de dolos, as famosas pezas xigantescas de formigón, que se poden ver nas proximidades. Serviron para construír o porto de San Cibrao, colocándose entrelazadas como un crebacabezas.
Continuando a senda costeira, chegarás aos famosos Cantís de Papel, outro importante recurso xeolóxico da nosa costa.
