Miradoiro da Frouseira. Xeoturismo
O miradoiro da Frouseira atópase no límite entre os concellos de Alfoz e Foz. As vistas panorámicas que ofrece son espectaculares, así como as formas que adquiren as rochas durante o seu proceso de desgaste.
Dende o punto de vista xeomorfolóxico este lugar é un domo granítico -semellante en orixe ao Pão de Açúcar de Río de Janeiro-.
Trátase dunha forma prominente e elevada na paisaxe resultado dunha erosión máis intensa nas rochas que había ou hai a súa arredor. Debido a que estaban máis fracturadas ou porque poidan ser desgastadas máis doadamente. Bos exemplos de formas erosivas son as pías -depresións onde se acumula auga- e as acanaladuras -desaugadoiros das pías-, moi frecuentes nos granitos desta zona.
As rochas protagonistas deste punto son os granitos, uns materiais de orixe magmático intrusivo, é dicir, son rochas formadas a partir do arrefriado de magma no interior terrestre, a profundidades comprendidas entre os 10 e os 15 quilómetros, por ese motivo os seus tres minerais -seixo, feldespato e mica- son visibles dunha ollada. Neste caso o magma xerouse pola intensa calor producida por un gran choque de dous supercontinentes -Laurusia e Gondwana- fai 290 millóns de anos.
No camiño de acceso a este miradoiro afloran unhas rochas moi singulares, son as sienitas.
Estes materiais caracterízanse pola súa cor rosada, aínda que a súa textura parécese moito á dos granitos. As sienitas son rochas tamén magmáticas, aínda que en ocasións poden orixinarse a partir de granitos -como é o caso deste lugar-. Dita transformación produciuse pola circulación de augas termais ricas en ferro a través das facturas que había no terreo. A interacción entre estes fluídos e as rochas graníticas, produce un cambio nos seus minerais. Disólvese o seixo, o feldespato vólvese rosado polas impurezas de ferro e a mica negra transfórmase en mica verde.
A paisaxe que se contempla dende A Frouseira é moi irregular, por unha banda hai montañas elevadas e escarpadas, como son as serras do Xistral e A Toxiza, e por outro hai vales amplos e fértiles, como os do Valadouro e Masma. Isto débese ao coñecido como modelado en bloques ou teclas de piano, proceso xeolóxico que se iniciou hai uns 70 millóns de anos resultado do choque entre a placa euroasiática e a africana.
Máis información: Castelo Fortaleza de A Frouseira.
Outras propostas para a práctica do Xeoturismo na Mariña. Máis info aquí.
