Castelo Fortaleza da Frouseira
A fortaleza de Pena Frouseira aparece por primeira vez mencionada nun documento de 1156 como dependencia episcopal e probablemente se mantivo así ata o século XV. Os restos conservados desta gran fortificación que tivo ata tres núcleos amurallados, están declarados Ben de Interese Cultural (BIC).
Identificado como o Castelo do mítico mariscal Pedro Pardo de Cela, os restos arqueolóxicos atópanse situados nun gran afloramento granítico de 429 metros de altura que lle proporcionaba un excepcional control territorial e que o converte nun miradoiro único sobre gran parte do litoral da Mariña Lucense e sobre o val do río Ouro entre os concellos de Alfoz e O Valadouro.
Despois de sufrir serios danos durante a Revolta Irmandiña (1467-1469), o mariscal Pedro Pardo de Cela -considerado unha das figuras históricas máis destacadas de finais da Idade Media en Galica- recuperou o seu control e levou a cabo a súa reconstrución contra a normativa dictada polos Reis Católicos para derribar os castelos e fortalezas que non foran cabeza de meirindade - división administrativa de orixe medieval-. En 1481, Pardo de Cela e os seus aliados defenderon esta fortaleza durante un duro asedio de entre oito meses e dous anos, por parte das tropas castelás. Finalmente foi tomada e derribada converténdose nun dos escenarios do ocaso do Mariscal e en materia de cantigas e lendas.
A planta destas construcións xurdía da adaptación ás irregularidades do terreo e das súas necesidades defensivas. Debido a isto e ao mal estado de conservación dos restos arqueolóxicos, non se pode definir claramente a disposición das estancias que darían forma ao conxunto.
Conta a lenda que os mandatarios dos Reis Católicos, enfrontados co Mariscal, tramaron a traizón da Frouseira ante a imposibilidade de poder conquistala. A Pardo de Cela traizoárono os 23 criados que defendían a fortaleza. Segundo as cantigas o traidor tería sido Roi Cofano do Valadouro. A firme loita durante tres anos na Frouseira, a traizón dos criados e a súa execución, degolado na praza da Catedral de Mondoñedo, convérteno enseguida en mito comezando a ser trobado en feiras e mercados.
Acceso:
O primeiro tramo de acceso pode facerse en coche subindo por unha pequena pista de dobre sentido. Para o último tramo, que se deberá realizar camiñando uns 10 minutos, recomendamos levar calzado cómodo.
Para saber máis:
