Porto de Burela. Xeoturismo
A zona de visita atópase emprazada no núcleo urbano do concello de Burela. O porto de Burela alberga o contacto entre os granitos do chamado batolito de San Cibrao, gran corpo magmático que se estende desde Burela ata a ría de Viveiro, e un conxunto de rochas metamórficas formado por cuarcitas e lousas.
Cuarcitas e lousas con orixe no hemisferio Sur
Estas últimas rocas orixináronse a partir de antigos sedimentos areosos e fangosos respectivamente, e acumulados en zonas mariñas próximas a unha costa do hemisferio Sur hai aproximadamente 520 millóns de anos. De feito, aínda son visibles estruturas sedimentarias como os ripples -similares a dunas formadas baixo a auga-, que axudan á interpretación do que foi todo isto. Estes sedimentos unha vez compactados serían sometidos a un incremento na presión e temperatura, o que os transformaría nas rochas que son a día de hoxe.
Lugar de interese xeolóxico internacional
Singular conxunto de dobras
Nos materiais metamórficos é onde precisamente se atopa o interese xeolóxico de relevancia internacional, ou tamén denominado “geosite”. O motivo é claro, alberga un impresionante conxunto de dobras continuas e perfectamente definidas nos cortes do terreo xunto á chaira da lonxa -era o cantil antes da construción do porto-. Estas estruturas xeolóxicas orixináronse cando as rochas tiñan plasticidade -flexibles- debido a un colosal choque entre dous supercontinentes -Laurusia e Gondwana- fai uns 350 millóns de anos. As dobras do porto de Burela teñen uns trazos moi distintivos, por unha banda, o espesor das capas non se conserva igual ao longo de toda a estrutura, é maior na zona de máxima curvatura; e por outra indicar que a dobra non se sitúa en posición vertical, senón que está inclinada cara ao Leste, isto é debido a que os esforzos maiores no proceso de pregamento viñan dende o Oeste.
Outras formacións xeolóxicas
Ao final da chaira do porto, a presenza dun salientable filón de seixo, facilitou a formación dun conxunto de arcos rochosos. É o que localmente se denomina “Igrexa de Coeda”.
Por riba das dobras hai un depósito moito máis recente -1 millón de anos- de cantos rodados, areas e arxilas que se interpretan como antigas torrenteiras da erosión das montañas próximas. Ata hai poucos anos estes materiais interpretábanse como de orixe mariña, é dicir que, do mesmo xeito que a rasa cantábrica, formáronse baixo o mar pero púidose comprobar e demostrar que en ambos os casos todo teñen unha orixe continental.
Xeorutas Burela (organizadas polo Concello en tempada alta). Máis info na Oficina de Turismo de Burela.
Outras propostas para a práctica do Xeoturismo na Mariña. Máis info aquí.
Máis información: Porto de Burela.
