A Mariña Virtual

Na Mariña Virtual concéntranse todos os tesouros da Mariña lucense na súa forma máis moderna e interactiva, un espazo no que todos os visitantes interactúan e poden descubrir os segredos e enclaves da comarca dende múltiples puntos de vista.

Coa axuda das TIC, neste centro integral de turismo os visitantes poden descubrir todo o potencial dun destino como A Mariña Lucense que con preto de 100 quilómetros de costa e na Serra do Xistral esconde non só marabillas naturais, senón que conserva a pegada do seu pasado nos seus enclaves de patrimonio cultural.

Neste novo centro integral de turismo, os asistentes poden coñecer de primeira man as posibilidades desta instalación que facilita a interacción con personaxes históricas, viaxando no tempo e na historia
a través de tecnoloxías como a realidade aumentada, montaxes 3D, videogravación inmersiva e tamén a través da realidade virtual.

Podemos ver paneis nos que consultar a programación cultural e as actividades de interese turístico da Mariña, un curioso mapa da Mariña que mediante a aplicación de realidade aumentada Layar permite acceder a contidos dende o noso smartphone. 

Un panel interactivo permítenos viaxar pola historia dende os principios do século XX até a actualidade (descubríndonos o legado fotográfico local).

Un casco de realidade virtual Oculus Rift permítenos visitar unha serie de localizacións (a Praia das Catedrais, o Castro de Fazouro, o Complexo Siderúrxico e Cerámico de Sargadelos e o Souto da Retorta) de grande atractivo de xeito inmersivo (mediante vídeo estereoscópico envolvente).

Un panel interactivo convídanos a mergullarnos no patrimonio da Mariña (o que tamén podemos facer a través da aplicación móbil Matterport VR se contamos casco de realidade virtual para o noso smartphone).

E outros paneis interactivos acércannos moita máis información de A Mariña Lucense, permitindo que o usuario sexa o que decida que tipo de información quere localizar na comarca dende o aire.