Fuciño do Porco
Sendeiro espectacular pola costa do Vicedo que alterna pequenas praias coa costa rochosa de cantís e furnas. A través de pasarelas de madeira e camiños, asómanos ao Mar Cantábrico desde miradoiros naturais con marabillosas vistas sobre a Ría de Viveiro.
Desde esta atalaia poderemos contemplar as illas Gabeira, a Insua, Coelleira, as puntas do Faro Roncadoiro e Estaca de Bares e divisar ao fondo da ría, Covas, Viveiro e o porto de Celeiro.
····
Recorda que nos meses de xullo e agosto (EXCEPTO EN 2024 POR PROHIBICIÓN DE ACCESO ÁS PASARELAS), co fin de mellorar a experiencia e o coidado da contorna, deberás realizar previamente unha reserva de forma gratuita vía web en puntafucinodoporco.gal
····
A Punta Socastro é coñecida popularmente como o Fuciño do Porco, polo parecido que desde o mar ten co fociño dun porco.
O sendeiro parte da praia de Abrela, e tras pasar pola pequena praia de Porto de Val e a praia de Alegrín, e a antiga cetaria de Medas do Castro, construída nesta contorna rochosa para a cría de marisco, chegamos finalmente, á Punta Socastro, que é un miradoiro natural sobre a praia de Pereira e Area Grande e a Ría de Viveiro.
O tramo final discorre serpenteante, practicamente colgado sobre o mar, sobre pasarelas de madeira e estreitas escaleiras, azoutadas con frecuencia polo vento
Destaca neste tramo final, unha veta ferruxinosa moi escura que foi explotada nunha antiga mina de ferro do século XVIII, chamada Testa de Ferro. O mineral acumulado ao pé do cantil abastecía ao primeiro alto forno de Sargadelos.
O sendeiro termina na baliza luminosa da punta.
* O acceso a Fuciño do Porco (pasarelas) permanece pechado -desde novembro de 2023- tras rexistrarse un importante desprendemento no terreo, o que impide acceder de forma segura. Non hai data fixada para a súa reapertura.
A zona anterior ás pasarelas e todo o paseo que leva a elas é de acceso libre e sen reserva.
