Festivais na Mariña

Na Mariña Lucense celébranse eventos musicais que nos ofrecen desde xéneros populares e artistas locais a bandas internacionais e sons moi diferentes. A nosa axenda promete satisfacer aos gustos máis eclécticos.

Valadouro Rock en O Valadouro (22 de xuño de 2024). + INFO

Neste 2024 celébrase a primeira edición deste festival que contará con nove bandas que abarcan todo o abanico de rock, con diferentes estilos. Como cabeza de cartel atópase a mítica banda Obús que fará parada no Valadouro dentro da Xira da súa cuartenta aniversario. Xunto a eles estarán presentes un bo elenco de bandas estatais Gigatrón -tamén de celebración cos seus 25 anos de carreira-, Vita Imana, Strike Back, Costas (ex-Sinistro Total), Materia Morta, Sküld e Leather Boys.

Resurrection Fest en Viveiro (Do 26 ao 29 de xuño de 2024). + INFO

É un dos festivais de música máis importantes do país e converteuse nunha referencia dentro do xénero do rock e o metal. Ofrece unha ampla variedade de xéneros e bandas internacionais, co obxectivo de reunir a amantes destes estilos musicais. É un evento que vai máis aló da música, creando un ambiente festivo e acolledor onde os asistentes poden gozar dunha experiencia completa e conectar con outros fanáticos da música alternativa. No 2024, un total de oitenta e nove bandas se anuncian para esta edición entre as que podes atopar grandes nomes como Avenged Sevenfold, Bring Me The Horizon, Alice Cooper, The Offspring, Machine Head, Sum 41, Megadeth, Bad Omens,ou Bruce Dickinson.

  VI Ether - An Electronic Odyssey (do 18 ao 20 de xullo en 2024) + INFO

Este festival de música Tecno, House e Disco, reune en Viveiro a un destacado grupo de artistas do panorama nacional e internacional. Este ano o evento cambia de ubicación pasando a celebrarse no parque Pernas Peón . Nesta VI Edición 2024, forman parte do cartel Carla Schmitt, Carlos Willengton, Caste, Isma B, Karras Martinez, Krenvko, Laia, Mury, Zisko, Annie Hall, Antigone, Caiva, Death Whistle, Gadus Morhua, Llonas, Pushmann, Cessabit e Irene Castro.

Festival Aturuxo en Ourol (19 e 20 de xullo de 2024) + INFO

Na parroquia de Bravos de Ourol, ten lugar este festival de música folk que contou na súa edición 2023 coa presenza de Manu Kasoaparte, Pakolas, Zé Pequeño, A Pedreira, Catuxa Salom, Loita Amada e Tecor Societário. A organización celebra ademais o venres unha cea popular e foliada e durante o sábado ten lugar a III Feira Artesá na que tamén haberá xogos e se disputará un aberto de billarda.

Vendaval Fest en Ribadeo (26 e 27 de xullo de 2024) + INFO

No 2024 será a segunda edición, na que nos traerán grupos nacionais e algúns locais para gozar do rock. No seu cartel atopamos a La Fuga, O'Funkillo, Dixebra, Familia Caamagno, Corazones Eléctricos, Os John Deeres, Baja California, Remakers, Superfuzz e The Nineties.

Bal y Gay (Do 8 ao 23 agosto en 2024) + INFO

Festival de música clásica que se organiza en distintas localizacións emblemáticas da Mariña Lucense, nesta edición algúns dos lugares nos que poderemos gozar da música serán o Pazo de Fontao en Santa Cilla-Foz, Igrexa de San Francisco de Viveiro, Igrexa de Santiago de Foz, Basílica de San Martiño en Foz, Catedral Basílica da Asunción en Mondoñedo, Mosteiro de San Salvador de Lourenzá, Fortaleza Castelo de Castro de Ouro en Alfoz, entre moitos outros espazos  destacados.

O obxectivo deste festival e achegar a música clásica de calidade a lugares onde non é tan accesible poder escoitala. Ano tras ano achéganse a este evento algúns dos artistas máis recoñecidos a nivel nacional e internacional. Nesta edición 2024 poderemos gozar da música do cuarteto Elias String Quartet, do violinista Sergey Khachatryan, do grupo Nereydas, do conxunto Musica Ficta, do pianista Martín García García, da soprano Ruth Iniesta, da Orquestra Sinfónica do Principado de Asturias, da soprano Katharina Konradi xunto co cuarteto Cosmos Quartet, de André Cebrián e Pedro Mateo González e da Orquestra Sinfónica de Galicia.

  Vrao en Foz (17 de agosto en 2024) + INFO

Festival de música independente aberto e en galego, que busca reunir as mellores bandas de música do panorama galego, para valorizar a nosa lingua. Así o demostra o cartel da edición 2024 que contará coa presencia de: Ataque Escampe, Alcalá Norte e outros pendentes de revelar.

O Xara Fest en Ribadeo (17 de agosto de 2024) + INFO

No 2023 tivo lugar o primeiro festival de música underground de Ribadeo. Un festival feito por e para a mocidade co obxectivo de crear cultura e promover un lecer alternativo que, segundo a organización, é  pouco habitual neste territorio. Para coñecer as novidades deste 2024 podes consultar o seu Facebook na ligazón de arriba.

Osa do Mar en Burela (6, 7 e  8 de setembro de 2024) + INFO

Este festival presenta unha variada programación de artistas e bandas de diversos xéneros, desde propostas alternativas ata sons electrónicos vangardistas. Os asistentes poden gozar de actuacións en vivo, DJs e descubrir novos talentos nun ambiente vibrante. Entre os artistas que atoparmos no seu cartel, podemos destacar sempre artistas emerxentes e moitos deles galegos. No seu cartel para este 2024 xa podemos ver nomes como Basquiat, Batuko Tabanka & Banda Krioula, Grande Amore, Iván Ferreiro, Mondra, Tanxugueiras ou The Rapants entre moitos outros artistas.

Y ya entrado el otoño, las propuestas continúan con,

Breason en Mondoñedo (9 de novembro en 2024) + INFO

Neste festival poderás gozar das rúas de Mondoñedo cheas de música, cultura e diversión. O programa conta con nomes recoñecidos a nivel nacional dentro do panorama  da música independiente e galega. Nesta segunda edición están confirmados Catuxa Salom, Los Rastreadores, Dillas de Cassandra, Grande Osso, Ruxe Ruxe e The Skarnivals. 

A variedade e tal que non sabemos que elixir!! Imos facer oco na nosa axenda para non perdernos nada!! 

Acompáñasnos?

*FOTOS: Osa do mar (Xavi Iglesias) - Bal y Gay (Xaora Fotógrafos) - Ressurection Fest