Festivais na Mariña

Na Mariña Lucense celébranse eventos musicais que nos ofrecen desde xéneros populares e artistas locais a bandas internacionais e sons moi diferentes. A nosa axenda promete satisfacer aos gustos máis eclécticos.

Valadouro Rock en O Valadouro (Sen información Edición 2025). + INFO

No 2024 celebrouse a primeira edición deste festival que contou con nove bandas que abarcan todo o abanico de rock, con diferentes estilos. Como cabeza de cartel atopábase a mítica banda Obús que fixo parada no Valadouro dentro da Xira do seu cuarenta aniversario. 

Resurrection Fest en Viveiro (Do 25 ao 28 de xuño de 2025). + INFO

É un dos festivais de música máis importantes do país e converteuse nunha referencia dentro do xénero do rock e o metal. Ofrece unha ampla variedade de xéneros e bandas internacionais, co obxectivo de reunir a amantes destes estilos musicais. É un evento que vai máis aló da música, creando un ambiente festivo e acolledor onde os asistentes poden gozar dunha experiencia completa e conectar con outros fanáticos da música alternativa. No 2024, un total de oitenta e nove bandas se anuncian para esta edición entre as que podes atopar grandes nomes como Avenged Sevenfold, Bring Me The Horizon, Alice Cooper, The Offspring, Machine Head, Sum 41, Megadeth, Bad Omens,ou Bruce Dickinson.

  VIII Ether - An Electronic Odyssey (19 de xullo de 2025) + INFO

Este festival de música Tecno, House e Disco, reune en Viveiro a un destacado grupo de artistas do panorama nacional e internacional. 

Festival Aturuxo en Ourol (18 e 19 de xullo de 2025) + INFO

Na parroquia de Bravos de Ourol, ten lugar este festival de música folk que contou na súa edición 2023 coa presenza de O Sonoro Maxín, Belém Tajes, Zeltia Irevire e Filophóbicas. 

Vendaval Fest en Ribadeo (25 e 26 de xullo de 2025) + INFO

No 2025 será a súa terceira edición, na que nos traerán grupos nacionais e algúns locais para gozar do rock. Nos seus carteis pasados atopamos a La Fuga, O'Funkillo, Dixebra, Familia Caamagno, Corazones Eléctricos, Os John Deeres, Baja California, Remakers, Superfuzz e The Nineties.

Bal y Gay (Do 12 ao 21 agosto en 2025) + INFO

O Festival Bal y Gay presentou a programación da súa 12ª edición, que se celebrará do 12 ao 21 de agosto con 11 concertos en diversos municipios da Mariña. Participarán artistas destacados como Denis Kozhukhin, Leticia Moreno, Núria Rial, Borja Quiza, Marco Mezquida e agrupacións como os cuartetos Casals e Quiroga, ademais de orquestras como a Real Filharmonía de Galicia e a Orquestra Sinfónica do Principado de Asturias.

Unha das novidades máis destacadas será a interpretación do Réquiem de Mozart na Catedral de Mondoñedo, o primeiro concerto sinfónico-coral na historia do festival.

Desde o seu inicio no 2014 como un curso de clarinete na pequena parroquia de Nois, o festival medrou ata converterse nunha cita clave do verán musical español, con máis de 100 concertos, 400 artistas e máis de 20.000 espectadores. Impulsado pola Fundación Xesús Bal y Gay, a súa misión é democratizar a música clásica e descentralizar a cultura, enriquecendo tanto á poboación local como ao turismo en Galicia.

  Vrao en Foz (17 de agosto en 2024) + INFO

Festival de música independente aberto e en galego, que busca reunir as mellores bandas de música do panorama galego, para valorizar a nosa lingua. Así o demostra o cartel da edición 2024 que contou coa presencia de: Ataque Escampe, Alcalá Norte e outros mais.

O Xara Fest en Ribadeo (30 de agosto de 2025) + INFO

No 2023 tivo lugar o primeiro festival de música underground de Ribadeo. Un festival feito por e para a mocidade co obxectivo de crear cultura e promover un lecer alternativo que, segundo a organización, é  pouco habitual neste territorio. Para coñecer as novidades deste 2024 podes consultar o seu Facebook na ligazón de arriba.

Osa do Mar en Burela (5, 6 e 7 de setembro de 2025) + INFO

Este festival presenta unha variada programación de artistas e bandas de diversos xéneros, desde propostas alternativas ata sons electrónicos vangardistas. Os asistentes poden gozar de actuacións en vivo, DJs e descubrir novos talentos nun ambiente vibrante. Entre os artistas que atoparmos no seu cartel, podemos destacar sempre artistas emerxentes e moitos deles galegos. No seu cartel para este 2024 xa podemos ver nomes como Basquiat, Batuko Tabanka & Banda Krioula, Grande Amore, Iván Ferreiro, Mondra, Tanxugueiras ou The Rapants entre moitos outros artistas.

E xa entrado o outono, as propostas continúan con,

Breason en Mondoñedo (8 de novembro en 2025) + INFO

Neste festival poderás gozar das rúas de Mondoñedo cheas de música, cultura e diversión. O programa conta con nomes recoñecidos a nivel nacional dentro do panorama  da música independiente e galega. Nesta segunda edición están confirmados Catuxa Salom, Los Rastreadores, Dillas de Cassandra, Grande Osso, Ruxe Ruxe e The Skarnivals. Esperamos mais información para a edición de 2025, que se levará a cabo o 8 de novembro.

A variedade e tal que non sabemos que elixir!! Imos facer oco na nosa axenda para non perdernos nada!! 

Acompáñasnos?

*FOTOS: Osa do mar (Xavi Iglesias) - Bal y Gay (Xaora Fotógrafos) - Resurrection Fest