A Mariña Lucense leva o seu potencial turístico a INTUR 2025 en Valladolid

A Mancomunidade de Concellos da Mariña Lucense participa este ano activamente na Feira Internacional de Turismo de Interior (INTUR), que se celebra en Valladolid do 13 ao 16 de novembro co obxectivo de dar a coñecer a súa ampla e diversa oferta turística. Unha acción de comunicación enmarcada no Plan de Sostibilidade Turística na Mariña Lucense financiado pola propia entidade, a Axencia Turismo de Galicia e a Secretaría de Estado de Turismo. 

Dende o seu stand, o equipo da Mancomunidade recibirá visitantes e profesionais do sector, presentando os moitos atractivos dun territorio composto por 16 concellos que apostan por un modelo de turismo sostible e responsable.

Durante a feira, a Mancomunidade manterá contacto con profesionais e provedores de servizos turísticos, co propósito de promover sinerxías e intercambiar información sobre produtos e iniciativas de interese para o xeodestino.

Un destino con personalidade propia
A Mariña é un lugar que combina gastronomía, paisaxe, patrimonio, cultura e deporte. Cada ano, milleiros de persoas escollen este recuncho do norte de Galicia para gozar de escapadas e vacacións únicas, atraídas pola autenticidade, a natureza e o carácter acolledor das súas xentes.

Compromiso coa sustentabilidade
A presenza en INTUR servirá tamén para poñer en valor a aposta da Mariña por un modelo turístico integrador e respectuoso co medio ambiente, no que as persoas visitantes poidan gozar plenamente dos recursos naturais e culturais, preservando a súa riqueza para o futuro.

Unha ventá aberta ao mundo
A participación da Mariña Lucense en INTUR é unha oportunidade para seguir consolidando a súa proxección nacional e internacional, demostrando que este destino ofrece moito máis ca paisaxe: unha forma de entender o turismo baseada no respecto, na sustentabilidade e na experiencia auténtica.