Consellos e mellores épocas para observar aves na Mariña

Consellos para a observación de aves:

 Elixe os mellores momentos: Ao amencer e ao solpor a actividade das aves é maior. En zonas intermareais, consulta os horarios das mareas e intenta aproveitar a baixamar para maximizar as observacións.

 Aproveita os observatorios e miradoiros naturais: Ofrecen excelentes condicións para o avistamento de aves mariñas e acuáticas.

 Leva o equipo axeitado: Uns prismáticos de 8x42 ou 10x42 son esenciais, e un telescopio terrestre resulta útil para a observación de aves mariñas e limícolas a gran distancia.

 Roupa e calzado adecuado: Opta por cores neutras para non chamar a atención e usa calzado cómodo e impermeable se vas percorrer zonas húmidas.

 Sé discreto e respecta o entorno: Mantén o silencio, evita movementos bruscos e segue os camiños sinalizados para minimizar a alteración do hábitat.

 Consulta fontes especializadas: Aplicacións como eBird e guías de aves poden axudarche a identificar especies e rexistrar as túas observacións. Outras opcións son:

• SEO BirdLife:Información sobre especies, conservación e eventos ornitolóxicos en España.
• Galicia Birding: Recursos e rutas específicas para a observación de aves en Galicia.
• Merlin Bird ID: Aplicación gratuíta que permite identificar aves a través de fotografías e cantos.

Cando observar aves na Mariña Lucense:

A Mariña Lucense ofrece oportunidades de observación de aves durante todo o ano, con cada estación aportando especies e momentos clave. Grazas á súa diversidade de hábitats e á súa ubicación dentro do Corredor Migratorio Galaico-Cantábrico Occidental, esta comarca é un destino privilexiado para a ornitoloxía.

 Na primavera (marzo-xuño), os bosques de Mondoñedo, Ourol e Trabada cobran vida co canto de paxaros forestais como o merlo acuático (Cinclus cinclus), o peto verdeal ibérico (Picus sharpei) e o gabeador azul (Sitta europaea). Tamén é unha excelente época para observar rapaces nas súas zonas de cría. Na costa, as pardelas cincentas atlánticas (Calonectris borealis) chegan á Illa Coelleira (O Vicedo) para nidificar, mentres que nas marismas de Ribadeo, Foz e Barreiros comezan a aparecer limícolas en migración prenupcial.

 No verán (xuño-setembro) é un bo momento para a observación de aves mariñas en puntos como Cabo Burela e Punta Roncadoira (Xove), onde se poden ver pardelas, mascatos (Morus bassanus) e carráns (Sterna spp.). A finais de agosto, comezan a chegar os primeiros limícolas en paso migratorio posnupcial ás marismas e areais de Foz e Barreiros, con especies como a píllara real (Charadrius hiaticula) e o pilro tridáctilo (Calidris alba).

 No outono (setembro-novembro) prodúcese o momento de maior tránsito migratorio. Nas rías e marismas de Ribadeo, Foz e Barreiros, chega a invernada de aves acuáticas como o pato subiador común (Anas penelope) e o fuselo de rabo pinto (Limosa lapponica). Na costa, especies mariñas como o falaropo de bico groso (Phalaropus fulicarius) e os págalos (Stercorarius spp.) cruzan o litoral lucense na súa ruta cara ao sur. Estaca de Bares, situada na provincia da Coruña e a tan só 10 km da Mariña Lucense, xunto con Cabo Burela, son recoñecidos como os mellores lugares de Europa para a observación de aves mariñas. De entre eles, Cabo Burela é particularmente destacado se o que buscas é obter excelentes fotografías de aves mariñas, grazas ao seu acceso e puntos de vista estratéxicos.

 No inverno (decembro-febreiro) é ideal para a observación de aves invernantes. Foz, Ribadeo e Barreiros acollen grandes concentracións de ánades, cullereiros (Platalea leucorodia) e limícolas. Na costa, poden aparecer rarezas como o arao papagaio (Fratercula arctica) e a gaivota de Bonaparte (Chroicocephalus philadelphia) tras temporais atlánticos. No interior, os bosques de Mondoñedo e Ourol albergan especies como o tordo charlo (Turdus viscivorus) e a estreliña riscada (Regulus ignicapilla).

Cada municipio ofrece diferentes oportunidades segundo a época do ano, convertendo a Mariña Lucense nun destino imprescindíble para a observación de aves en Galicia, perfecto para a práctica do ecoturismo responsable.