Eclipse solar total do 12 de agosto de 2026 na Mariña

O vindeiro 12 de agosto poderemos observar un dos fenómenos astronómicos máis agardados: unha eclipse solar total, que se produce cando a Lúa se interpón entre a Terra e o Sol, proxectando a súa sombra sobre o noso planeta e bloqueando total ou parcialmente a luz da gran estrela. Isto ocorre cando os tres astros están aliñados, coa Lúa entre o Sol e a Terra e, para poder gozalo, temos que mirar ao ceo desde un lugar axeitado, xa que non é visible desde calquera punto do mundo.

Precisamente, Galicia —e, en especial, a provincia de Lugo e A Mariña— será un dos territorios máis recomendables para gozar deste fito astronómico.

Observación da eclipse desde A Mariña

A eclipse comezará ás 19:31 horas e o seu punto álxido espérase arredor das 20:28 e das 20:30 h. Se as nubes o permiten, poderá observarse a simple vista, tomando unha serie de precaucións e, en principio, non será necesario o uso de telescopio para vela. A Mariña Lucense é un dos lugares desde os que se poderá gozar durante máis tempo deste histórico acontecemento astronómico.

Máis abaixo nesta páxina poderás coñecer as diferentes localidades desde as que se poderá seguir a eclipse de sol na Mariña e a evolución desta.

Como inflúe o relevo na observación

O visualizador do Instituto Xeográfico Nacional (IGN), do Ministerio de Transportes e Mobilidade Sostible, incorpora unha capa de visibilidade que permite comprobar como pode afectar o relevo á observación da eclipse en cada punto concreto. Isto significa que, aínda que nun concello a eclipse figure como total, pode haber zonas desde as que non chegue a verse correctamente no momento de máximo porque unha montaña ou unha elevación do terreo oculte o Sol.

No mapa facilitado polo IGN, esas áreas aparecen sinaladas en negro. O propio IGN indica ademais que esta simulación ten en conta o relevo do terreo, pero non as árbores nin os edificios.

Máis información aquí

Recomendacións para ver a eclipse

Elixe puntos con boa visibilidade cara ao oeste, especialmente tendo en conta que a eclipse terá lugar ao solpor.
Consulta previamente o visualizador oficial do IGN e a súa capa de visibilidade, xa que nalgúns puntos o relevo pode ocultar o Sol no momento de máximo.
Planifica con antelación o punto de observación e acode con tempo suficiente, xa que se prevén desprazamentos masivos ese día.
Á hora de regresar é preferible agardar a que se despexe o tráfico e aproveitar a noite para observar a chuvia de estrelas das Perseidas. Unha experiencia, xunto coa eclipse, completa e única.
Non mires nunca ao Sol directamente, nin a simple vista nin con lentes de sol convencionais.
Utiliza unicamente lentes para eclipses homologadas, con referencia á norma ISO 12312-2:2015 e marcado CE no caso de produtos comercializados na Unión Europea.
Non empregues nunca métodos caseiros como radiografías, cristais afumados, CD, disquetes ou filtros non homologados. Atención aos vidros ou filtros de soldadura, tampouco son seguros.
Non observes a eclipse con prismáticos, cámaras, telescopios ou outros aparellos sen filtros solares axeitados, xa que poden causar danos graves e irreparables na vista.
Pon as lentes antes de mirar ao Sol. Primeiro colócaas coa vista cara abaixo e, só despois, dirixe a mirada ao Sol. Nunca mires ao Sol antes de ter as lentes postas.
Limita o tempo de observación. Fai pausas e descansa a vista, con intervalos duns 30 segundos. Para iso, e antes de quitar as lentes, asegúrate de mirar antes cara abaixo.
Se os nenos observan a eclipse, deben estar sempre baixo supervisión. Asegúrate de que leven as lentes correctamente postas e de que non miren ao Sol polos laterais das lentes.

Consulta as recomendacións ampliadas do IGN aquí.

Decálogo de turismo responsable durante a eclipse

Protexe a túa saúde e a dos teus.
Protexe a túa vista.
Planifica con antelación.
Infórmate e viaxa preparado.
Desprázate de forma segura e sostible.
Elixe ben o lugar de observación.
Aproveita a túa localización.
Reduce o risco de incendios e coida a contorna natural.
Respecta a convivencia coa comunidade local e o patrimonio cultural.
Elixe produtos locais.

Información máis detallada aquí

Planifica e elixe ben o lugar de observación

A Delegación do Goberno en Galicia comunicou 15 puntos de exclusión na Mariña, é dicir, lugares aos que non se poderá acceder para ver o fenómeno, así como propostas para a observación da eclipse remitidas polas entidades locais que se atopan en fase de avaliación, polo tanto a información que aquí se recolle podería ser susceptible de actualización nos próximos días. Ademáis, algúns concellos da Mariña identifican outras zonas sensibles a evitar.

Alfoz de Castrodouro, proposta de observación: Serra do Xistral na zona de Pena Abaladoira (non autocaravanas). Punto de exclusión: Castelo de Castrodouro

Barreiros, puntos de exclusión: Punta de Anguieira e sistema dunar de Altar, Monte Comado, Monte Cornería e Monte Penabor (prohibido acceso en vehículo, permítese acceso a pé con precaución deixando o vehículo en San Miguel de Reinante, Celeiro de Mariñaos e San Cosme de Barreiros según corresponda), Santo Estevo do Ermo, Castro de San Bartolo, Círculo lítico da Roda, Mirador da Barcela, Mirador de Pallares, Pasarela de madeira que comunica a praia de Arealonga coa praia das Catedrais e Punta do Castro (San Miguel de Reinante).

Burela, non establece puntos de observación nin de exclusión. Organiza actividades o día 8 e 12. Máis información no seguinte enlace.

Cervo, non establece puntos de observación nin de exclusión.

Foz, puntos de exclusión: A Frouxeira e o castro de Fazouro.

Lourenzá, non establece puntos de observación nin de exclusión.

Mondoñedo, non establece puntos de observación nin de exclusión.

Ourol, non establece puntos de observación nin de exclusión.

A Pontenova, non establece puntos de observación nin de exclusión.

Ribadeo, proposta de observación: aparcamento público das Catedrais. Organiza actividade o día 12. Máis información no seguinte enlace. Puntos de exclusión: praia das Catedrais, pasarela de madeira entre As Catedrais e Arealonga (Barreiros), Illa Pancha, pasarela de madeira do Cargadoiro.

Riotorto, non establece puntos de observación nin de exclusión.

Trabada, proposta de observación: Alto da Cadeira e Praza do Concello.

O Valadouro, non establece puntos de observación nin de exclusión.

O Vicedo, puntos de observación: praias de Xilloi, San Román, Abrela e Arealonga, porto, mirador de Muronovo, zona do parque eólico de Riobarba, igrexa de Cabanas e campos de fútbol do Vicedo e O Folgueiro. Punto de exclusión: Fuciño do Porco, Mirador de Tixoso, Ponte Río Sor, Mirador das Laxes, Ponte do Porto e Mirador de Moreiras.

Viveiro: non establece puntos de observación nin de exclusión.

Xove, puntos de exclusión: Cantís de papel, Punta da Mansa e Faro Roncadoiro. Puntos de observación: praias de Esteiro e Lago.

Podes ampliar a información a través das seguintes ligazóns:

Noticia El Progreso

Noticia La Voz

Para seleccionar o lugar desde o que observar a eclipse, lembra, como explicabamos máis arriba, consultar o visualizador do Instituto Xeográfico Nacional (IGN), que incorpora unha capa de visibilidade que permite comprobar como pode afectar o relevo á observación da eclipse en cada punto concreto.

Ademáis de ter en conta o decálogo do turismo responsable durante a eclipse.